Berdintasun

Berdintasun Proiektuak, S. Kooperatiboa Emakundek homologatutako aholkularitza da. Genero berdintasunaren alorreko zerbitzuak eskaintzen ditugu, enpresa, entitate zein erakundeei aholku emanez

Ezagutu gure proiektuak

Berdintasuneko taldea

Genero berdintasunari loturiko gai oro interesatu izan zait 80ko hamarkada hartan mugimendu feministan parte hartzen hasi nintzenetik.

Harrez geroztik, pertsonak izan ditut bereziki motibazio-iturri, giza taldeak, proiektuetan parte hartze aktiboa izatea, taldeak kudeatzea; betiere ikuspegi kritikoen, pluralen eta anitzen alde apustu eginda.

Gizarte Langintzan diplomatua, “Genero Berdintasuna arlo publiko eta pribatuan Unibertsitate Masterra”, Politika Publikoetako espezializazioa, eta “Kultur arteko Bitartekaritzan Aditua”.

2007-2011 aldian, ardura profesionala izan nuen Arabako Foru Aldundian Gizarte Sustapenerako Zuzendari gisa; horri esker, zuzendaritza- eta kudeaketa-lanen gaineko eskarmentua eta gaitasunak garatu nituen, hala pertsonen nola programen kudeaketan, eta hainbat gairen inguruan, hala nola: Emakume eta gizonen arteko Berdintasun Politikak, Immigrazio eta Kultur artekotasun Politikak, eta Garapenerako Lankidetza eta Giza Eskubideak.

Wassu-UAB Fundazioarekin Ikerlari, Emakume eta Neskatilen Genital Mutilazioaren prebentzioari buruz.

2013tik, ogibide gisa emakumezkoen taldekako nahiz banakako jabetzea xede duten proiektuak koordinatzen eta kudeatzen ditut.

Eskarmentu handikoa herrigintza-lanetan: gizartearekiko konpromisotik abiatuta boluntario gisa ibilia.

Josetxu dut izena, Lehen Hezkuntzako Magisteritzan diplomatua naiz (2011) eta Emakume eta Gizonen arteko Berdintasunaren gaineko Masterra egindakoa naiz, Euskal Herriko Unibertsitatean, EHUn (2012).

Hikaateneo elkarte politiko-kulturalean koordinatzaile lanetan aritu ostean, nire jarduera profesionalak azken 14 urteotan generoa eta maskulinitatea izan ditu ardatz, eta, horretarako, hainbat proiektu antolatu eta jarri izan dut abian instituzio, enpresa zein kolektiboen artean. 2008. urtetik Emakunde-Emakumearen Euskal Erakundeko Gizonduz ekimenean parte hartzen dihardut, bertako Idazkaritza teknikoan zehazki, 2018an aldi batez izan ezik. Horren helburua gizonon inplikazioa sustatzea da emakume eta gizonen arteko berdintasuna lortzeko bidean. Programa horren baitan koordinazio-lanetan jarduten dut, ikastaroak ematen ditut, bai aurrez aurre bai online, material teorikoak sortzen ditut, eta, era berean, programak abiarazten ditut maskulinitateez eta berdintasunaz.

Nire ustez, gizonekin lan egiteak berebiziko garrantzia du berdintasuna erdiesteko bidean euren parte hartzea areagotzeko; horregatik, hain zuzen ere, berdintasunaren aldeko taldeetan hartu izan dut parte, eta egun Estatu espainiarreko Berdintasunaren aldeko gizonen sareko kide naiz (Red de hombres por la igualdad). Hainbat talderen eta gizonen ahalegina biltzen duen espazioa da, eta elkarren babeserako eta elkartrukerako sareak sustatzeko sortu zen, gizonok berdintasunaren alde gehiago parte-hartzea helburu dutenak.

Nire ibilbide profesionala eraldaketa sozialarekiko eta eredu bidezkoago eta jasangarriagoen eraikuntzarekiko konpromiso sendoak gidatu du. Bokazio horrek hainbat arlotan espezializatzera eraman ninduen, hala nola elikadura-subiranotasunean, justizia sozialerako hezkuntzan eta genero-berdintasunean.

2016an gastronomiaren arloan hasi nuen bidea, eta horrek elikadurara ikuspegi tekniko batetik hurbiltzeko aukera eman zidan. Hala ere, denborarekin ulertu nuen elikadura ez zela soilik nutrizio edo sukaldaritza kontu bat, baizik eta jasangarritasunaren, justizia sozialaren eta giza eskubideen ardatz nagusi bat. Kezka horrekin, 2022an Garapenean eta Nazioarteko Lankidetzan espezializatzea erabaki nuen, eta horrek hainbat lurraldetan kontsumo arduratsua, elikadura subiranotasuna eta ekitatea lantzen dituzten proiektuetan lan egitera eraman ninduen.

Nire ibilbidean zehar, eraldaketa soziala helburu duten hezkuntza eta komunitate proiektuak garatu eta implementatu ditut, justizia sozialaren eta jasangarritasunaren inguruko hausnarketa eta ekintzaguneak sustatuz. Nazioarteko lankidetzaren bidez errealitate globalak gertutik ezagutzeko aukera ere izan dut, eta horrek indartu egin zuen intersekzionalitatearekiko eta garapenerako genero-ikuspegiarekiko dudan konpromisoa.

2024an Emakumeen eta Gizonen Berdintasunerako Masterra amaitu nuen, arlo feministako prestakuntza sendotzeko eta ikuspegi hori nire lanean txertatzeko. Urte horretan bertan, Berdintasun Proiektuak ekimenean hasi nintzen, zehazki, Gasteizko Jabetze Feministarako Eskolan. Gune horretatik, ikaskuntzako eta eraldaketa sozialeko prozesuak bultzatzen jarraitzen dut. Motibatzen nau ikasten jarraitzeak eta justizia soziala eta gizarte berdinzaleagoak eraikitzen lagunduko duten aldaketa-prozesuak sortzeak.

Beti argi izan dut eraldaketa sozialerako bidea pertsonekin zuzenean lan egitea dela, gizarte askeagoak, bidezkoagoak eta berdinzaleagoak lortzeko ezinbesteko aldaketa-motorra baikara.

Horregatik, Salamancako Unibertsitate Pontifizioan Psikologian lizentziatu nintzen, eta, ondoren, Madrilgo Unibertsitate Autonomoan Krisi, hondamendi eta larrialdi egoeretan esku-hartze psikosozialean espezialista graduondoko bat egin nuen. Hainbat urtetan, esku-hartze psikosoziala egin dut haurreria, nerabetasun eta gazteriarekin, eskubide-urraketen, giza mugikortasunaren eta babesgabetasun-arriskuaren egoeretan, hainbat testuinguru eta latitudeetan.

Beste kultura eta errealitate batzuk ezagutzeko gogoak Ekuadorren bizitzera eraman ninduen, eta han pertsonalki eta profesionalki garatu ahal izan nintzen hainbat urtez. Bizi-esperientzia horrek aukera eman zidan gizonekin eta maskulinitateekin lan egiteko mundura hurbiltzeko. Denbora horretan, berdintasunari eta maskulinitateei buruzko prestakuntza-prozesuetan lan egin ahal izan nuen zenbait organizazioekin: gizarte zibilekoak, erakunde publikoak eta nazioartekoak. 2015ean Ekuadorren Gizonekin eta Maskulinitateekin Lan Esperientzien Nazioarteko I. Topaketaren antolakuntzan ere parte hartu nuen.

Maila pertsonalean, urteak daramatzat berdintasunaren aldeko gizonen taldeetan parte hartzen, 2017tik Ongiz-Ezberdin elkarteko gizon taldekide. Gizonen aldaketa pertsonal eta kolektiboan sinesten dut; gizartea berdintasunerantz eraldatzeko funtsezko elementua da.

Jakin-min handia sortu izan dit beti pertsonok harremantzeko dugun modua; ustekabeko kidetasunetik sortzen diren erlazioek, loturak sortzeko erabaki kontzienteak, elkar miresteak eta elkarri eskaintzen dizkiogun zaintzak. Ondorioz, txikitatik erakarri naute feminismoak eta gizarte-borrokek.

Ikasteko aukera izan nuen, eta EHUko Zientzia Politikoko eta Kudeaketa Publikoko Gradua egin nuen. Ondoren, Ikasketa Feminista eta Generoko Masterra hautatu nuen, unibertsitate berean. Nire ikasketei esker asko ikasi dut, baina, batez ere, zalantzan jartzen nauten eta des-ikasten laguntzen didaden adiskideak egiteko aukera eman dit nire ibilbide akademikoak.

Horrela, Berdintasun Proiektuak taldean hasi naiz lanean. Horrek aukera eman dit berdintasunaren arloko nire ezagutzak lurreratzeko, eta helburu horren alde lan egiteko.

Prestatzen, pentsamendu kritikoa lantzen eta aliantzak sortzen jarraitzea gustatuko litzaidake. Mundu atseginago eta berdintsuago batean sinesten dut, eta, beraz, itxaropen handia dut etorkizunarengan.

Edozein bizitzaren eremutan eraldaketa pertsonala eta kolektiboa posible delakoan nago. Gizarte berdinzalea eta tolerantea, non aniztasuna errespetatzen den eta pertsonen arteko harremanetan menperatzeari uko egiten dion, eraiki dezakegu. Genero-berdintasunari dagokionez, gizonen konpromesua ezinbestekoa da.

Akademikoki, Magisteritza eta Teologia ikasketak egin nituen eta URJCn Genero Berdintasunean Masterra egina daukat.

Profesionalki, Lehen Hezkuntzako irakaslea izan naiz eta azken urteotan Arabako Foru Aldundian Aukera-Berdintasunaren teknikari aritu naiz lanean. Berdintasunaren aldeko gizonen aldaketa pertsonalean nahiz kolektiboan konprometiturik urte asko daramat. Prozesu hori 2006an hasi zen. Arabako Foru Aldundiak, Euskal Herriko Unibertsitatearekin batera, gizonentzako ikastaroa eskaini zuen, gizon horiek beste gizon-taldeen dinamizatzaile izateko asmoz. Handik Aurrera, 2018ra arte, EZ:BERDIN elkarteko kidea izan naiz, gizon-taldeen partaide zein bideratzaile. Berdintasunaren aldeko gizonen Euskal Herriko Elkargune, Gizon Sareko kidea ere izan naiz.

Berdintasun taldekidea izatea eta nire denbora genero-berdintasuna lortzeko sentsibilizatzeari eta prestakuntzari ekitea zorte handia da. Simone de Beauvoir-ek honela bukatzen du bere liburua Bigarren sexua: “Gizakiari ezarritako munduaren baitan askatasunaren erresuma nagusitaraztea dagokio; goreneko garaipen hori erdiesteko ezinbestekoa da, beste gauza batzuen artean, desberdintasun naturalen gainetik, gizonak eta emakumeak haien arteko senidetasunari zalantzarik gabe eustea.” Esaldi honek berdintasunarako bidean inspiratzen nau.

11 urterekin saskibaloian jokatzen nuen nire ikastetxeko taldean, neska indartsu eta borrokalariz osatutako talde bat, eskola kirolean nire herrian, Laudion, inoiz lortu ez ziren tituluak lortu zituena. Hala ere, ez genuen inoiz geure ekipajerik izan, ezta errekonozimendu keinurik ere. Ekipajeak futbolean ari ziren mutilengandik zetozen… Seguruenik, une hartan ez nuen asmatu horri izenik jartzen, baina gogoan dut desberdintasun sentsazioa eta errekonozimendu falta.

Urte batzuk geroago, Institutuan, eta zortea izan genuen irakasle feministei esker, feminismoaren kontu hura ezagutzen joan nintzen, eta kontzientzia feminista handituz joan zen, mundu honetan dugun posizioa zalantzan jarriz.

Feminismoan gaitzea askoz geroago etorri zen; 2011. urtean Unibertsitatera itzuli nintzen eta Emakume eta Gizonen Berdintasuneko Masterra egin nuen EHU-UPVn eta ondoren Deustuko Unibertsitateko Emakumeen aurkako indarkerian esku hartzeko Masterra.

Harrezkero, emakumeen elkarte munduari lotutako hainbat proiektutan lan egin dut, euskal administrazio publikoan. Horreztaz gain, hainbat erakunde eta empresetan formakuntza eman dut.

Jabi dut izena, Ermuan jaio nintzen 1974an eta hiru neska gazte zoragarriren aita naiz. Gazte-gaztetatik, eta anaiaren eragin zuzenagatik, nire interesak eta jarduerak gizarte-ekintzaren ingurukoak izan dira beti: justizia soziala, antimilitarismoa, internazionalismoa edo pobreziaren aurkako borroka, besteak beste, izan dira oinarrizko gizarte-mugimenduen esparruan aktiboki parte hartzera bultzatu nauten gaiak.

Tipo xumea, lasaia, eta alaia naizela uste dut. Xakelaria, bibliofiloa eta irakurle amorratua naiz; bitxikeria gisa, esan dezaket literatura klasikoa maite dudala, bereziki XIX. mendeko eleberria.

“Zipriztintzen” Ermuko Berdintasunaren aldeko Gizonen taldeko kidea naiz 2007an sortu zenetik. Beti esan dut talde honetako kide izatea izan dela nire bizitzako mugarririk garrantzitsuenetako bat; izan ere, denbora gizon zoragarriekin partekatzeaz gain, feminismorako eta maskulinitateei buruzko ikasketetarako sarbidea izan zen niretzat. Orduz geroztik, feminismoekin, berdintasunarekin, gizonekin eta maskulinitateekin lotutako guztiaz interesatzen hasi nintzen. Eta horrela erabaki nuen nire bizitza profesionalari bira bat ematea eta genero-berdintasunean trebatzea.

Akademikoki Filosofia (1994) eta Historia (1998) ikasketak egin ditut EHUn eta UNED-en. 2019az geroztik, Berdintasuna sustatzeko goi-mailako teknikaria naiz. Nire bizitza profesionalaren zati handi bat tokiko administrazio publikoan garatu dut, genero-berdintasunarekin, gizarte-prestazioekin eta diru-sarrerak bermatzeko errentarekin lotutako gaietan, eta, horri esker, leku pribilegiatu batean bizi izan naiz, kontzientzia kritikoa garatzeko eta aniztasunaren alde egiteko.

Leonard Cohenek “Anthem” izeneko bere abestian dio: “Arrakala bat dago gauza guztietan, horrela sartzen da argia”, eta horrela bizi naiz eta berdintasunezko mundu baten aukera pentsatzen dut, beti dago lekua mundu justuago eta askeago baterantz aurrera egiteko.

Pozik eta harro nago 2024tik Berdintasun kide izateaz, arrazoi askorengatik, besteak beste: denborak eta espazioak pertsona-talde zoragarri batekin partekatzeak dakarren pribilegioagatik eta prestatzen jarraitzeko eskaintzen didan aukeragatik.

Nire kezka handietako bat berdintasunezko, parekidetasunezko eta bidezko gizarteak eraikitzeko gizonok dugun ardura da. Pertsonekin lan egitearen zale amorratua naiz, bereziki gizonekin.

Soziologian lizentziatua naiz (EHU, 1999), hernaniarra, eta etengabe ikasten eta xurgatzen ari naiz feminismoari eta LGTBIQ+ teoriei buruz. Emakume eta Gizonen arteko Berdintasunaren gaineko Masterra (EHU 2005), Garapena eta Nazioarteko Lankidetza Masterra (HEGOA, 2001). Hainbat administrazio publikotan egin izan dut lan, bertan zein eurentzako, irabazi asmorik gabeko erakundeetarako, baita nazioarteko organismoetarako ere. Nire ibilbidea, beraz, nagusiki bi arloren inguruan eraiki dut, alegia, gizon eta emakumeen arteko berdintasunean eta nazioarteko garapenerako lankidetzan.

Azken hamarkadotan, nire lan interes gune nagusiak gizon eta emakumeen arteko berdintasuna eta maskulinitateak izan dira, eta hala jarraitzen dute. On:Giz Berdintasunerako Elkartearen sortzaileetako bat naiz (2007). Genero eta maskulinitateen gaineko aholkulari gisa egin izan dut lan hainbat administrazio publikotan, nazioarteko organismotan (LANE), kolektibo sozialetan nahiz irabazi asmorik gabeko elkarteetan, batez ere EH mailan, Estatu mailan eta Ertamerikan.

Gizon Sarea elkargunearen sustatzaileetako bat izan nintzen, eta Estatuko Berdintasunaren aldeko gizonen sareko parte hartzailea naiz. Berdintasun Kooperatibaren talde ederreko kide izatearekin eta ekarpenak egitearekin pozarren.