Berdintasun Proiektuak, S. Kooperatiboa Emakundek homologatutako aholkularitza da. Genero berdintasunaren alorreko zerbitzuak eskaintzen ditugu, enpresa, entitate zein erakundeei aholku emanez
Berdintasuneko taldea
Elo Mayo Cabero
Genero berdintasunari loturiko gai oro interesatu izan zait 80ko hamarkada hartan mugimendu feministan parte hartzen hasi nintzenetik.
Harrez geroztik, pertsonak izan ditut bereziki motibazio-iturri, giza taldeak, proiektuetan parte hartze aktiboa izatea, taldeak kudeatzea; betiere ikuspegi kritikoen, pluralen eta anitzen alde apustu eginda.
Gizarte Langintzan diplomatua, “Genero Berdintasuna arlo publiko eta pribatuan Unibertsitate Masterra”, Politika Publikoetako espezializazioa, eta “Kultur arteko Bitartekaritzan Aditua”.
2007-2011 aldian, ardura profesionala izan nuen Arabako Foru Aldundian Gizarte Sustapenerako Zuzendari gisa; horri esker, zuzendaritza- eta kudeaketa-lanen gaineko eskarmentua eta gaitasunak garatu nituen, hala pertsonen nola programen kudeaketan, eta hainbat gairen inguruan, hala nola: Emakume eta gizonen arteko Berdintasun Politikak, Immigrazio eta Kultur artekotasun Politikak, eta Garapenerako Lankidetza eta Giza Eskubideak.
Wassu-UAB Fundazioarekin Ikerlari, Emakume eta Neskatilen Genital Mutilazioaren prebentzioari buruz.
2013tik, ogibide gisa emakumezkoen taldekako nahiz banakako jabetzea xede duten proiektuak koordinatzen eta kudeatzen ditut.
Eskarmentu handikoa herrigintza-lanetan: gizartearekiko konpromisotik abiatuta boluntario gisa ibilia.
Josetxu Riviere Aranda
Josetxu dut izena, Lehen Hezkuntzako Magisteritzan diplomatua naiz (2011) eta Emakume eta Gizonen arteko Berdintasunaren gaineko Masterra egindakoa naiz, Euskal Herriko Unibertsitatean, EHUn (2012).
Hikaateneo elkarte politiko-kulturalean koordinatzaile lanetan aritu ostean, nire jarduera profesionalak azken 14 urteotan generoa eta maskulinitatea izan ditu ardatz, eta, horretarako, hainbat proiektu antolatu eta jarri izan dut abian instituzio, enpresa zein kolektiboen artean. 2008. urtetik Emakunde-Emakumearen Euskal Erakundeko Gizonduz ekimenean parte hartzen dihardut, bertako Idazkaritza teknikoan zehazki, 2018an aldi batez izan ezik. Horren helburua gizonon inplikazioa sustatzea da emakume eta gizonen arteko berdintasuna lortzeko bidean. Programa horren baitan koordinazio-lanetan jarduten dut, ikastaroak ematen ditut, bai aurrez aurre bai online, material teorikoak sortzen ditut, eta, era berean, programak abiarazten ditut maskulinitateez eta berdintasunaz.
Nire ustez, gizonekin lan egiteak berebiziko garrantzia du berdintasuna erdiesteko bidean euren parte hartzea areagotzeko; horregatik, hain zuzen ere, berdintasunaren aldeko taldeetan hartu izan dut parte, eta egun Estatu espainiarreko Berdintasunaren aldeko gizonen sareko kide naiz (Red de hombres por la igualdad). Hainbat talderen eta gizonen ahalegina biltzen duen espazioa da, eta elkarren babeserako eta elkartrukerako sareak sustatzeko sortu zen, gizonok berdintasunaren alde gehiago parte-hartzea helburu dutenak.
Claudia García Ascacibar
Nire ibilbide profesionala eraldaketa sozialarekiko eta eredu bidezkoago eta jasangarriagoen eraikuntzarekiko konpromiso sendoak gidatu du. Bokazio horrek hainbat arlotan espezializatzera eraman ninduen, hala nola elikadura-subiranotasunean, justizia sozialerako hezkuntzan eta genero-berdintasunean.
2016an gastronomiaren arloan hasi nuen bidea, eta horrek elikadurara ikuspegi tekniko batetik hurbiltzeko aukera eman zidan. Hala ere, denborarekin ulertu nuen elikadura ez zela soilik nutrizio edo sukaldaritza kontu bat, baizik eta jasangarritasunaren, justizia sozialaren eta giza eskubideen ardatz nagusi bat. Kezka horrekin, 2022an Garapenean eta Nazioarteko Lankidetzan espezializatzea erabaki nuen, eta horrek hainbat lurraldetan kontsumo arduratsua, elikadura subiranotasuna eta ekitatea lantzen dituzten proiektuetan lan egitera eraman ninduen.
Nire ibilbidean zehar, eraldaketa soziala helburu duten hezkuntza eta komunitate proiektuak garatu eta implementatu ditut, justizia sozialaren eta jasangarritasunaren inguruko hausnarketa eta ekintzaguneak sustatuz. Nazioarteko lankidetzaren bidez errealitate globalak gertutik ezagutzeko aukera ere izan dut, eta horrek indartu egin zuen intersekzionalitatearekiko eta garapenerako genero-ikuspegiarekiko dudan konpromisoa.
2024an Emakumeen eta Gizonen Berdintasunerako Masterra amaitu nuen, arlo feministako prestakuntza sendotzeko eta ikuspegi hori nire lanean txertatzeko. Urte horretan bertan, Berdintasun Proiektuak ekimenean hasi nintzen, zehazki, Gasteizko Jabetze Feministarako Eskolan. Gune horretatik, ikaskuntzako eta eraldaketa sozialeko prozesuak bultzatzen jarraitzen dut. Motibatzen nau ikasten jarraitzeak eta justizia soziala eta gizarte berdinzaleagoak eraikitzen lagunduko duten aldaketa-prozesuak sortzeak.
Sergio Fuente Espeja
Beti izan dut argi gizarte-eraldaketak pertsonekin zuzenean lan egitea eskatzen duela, pertsonak baikara gizarte askeagoak, bidezkoagoak eta berdinzaleagoak eraikitzeko ezinbesteko eragilea.
Uste sendo horrekin, Psikologian lizentziatu nintzen Salamancako Unibertsitate Pontifikalean, eta, ondoren, Krisi, Hondamendi eta Larrialdi Egoeretako Esku-hartze Psikosozialean Espezialista izateko graduondokoa egin nuen Madrilgo Unibertsitate Autonomoan. Hainbat urtez, esku-hartze psikosozialaren arloan jardun dut profesionalki haur, nerabe eta gazteekin, bereziki eskubideen urraketa, giza mugikortasuna eta babesgabetasun-arriskua gertatzen diren egoeretan, testuinguru eta lurralde desberdinetan.
Beste kultura eta errealitate batzuk ezagutzeko nuen interesak Ekuadorrera bizitzera eraman ninduen, eta han pertsonalki zein profesionalki hazteko aukera izan nuen. Bizipen horri esker, gizonekin eta maskulinitateekin egiten den lanera hurbildu nintzen, eta berdintasunari eta maskulinitateei buruzko prestakuntza-prozesuetan parte hartu nuen, gizarte zibileko hainbat erakunderi, instituzio publikori eta nazioarteko organismori zuzenduta. Era berean, 2015ean Ekuadorren egin zen Gizonekin eta Maskulinitateekin Egindako Lan-esperientzien Nazioarteko I. Topaketaren antolakuntzan parte hartu nuen.
Arlo pertsonalean, hainbat urte daramatzat berdintasunaren aldeko gizonen taldeetan parte hartzen. 2017az geroztik, Ongiz-Ezberdin elkarteko gizonen talde bateko kidea naiz. Irmoki sinesten dut gizonen aldaketa pertsonala eta kolektiboa funtsezko elementua dela gizarte berdinzaleago baterantz aurrera egiteko.
Halaber, Euskal Herriko Unibertsitateko (UPV/EHU) Emakumeen eta Gizonen Berdintasuna: Berdintasun Agenteak masterra dut. Prestakuntza horri esker, nire ezagutzak zabaldu eta nire garapen pertsonal eta profesionalerako tresna berriak eskuratu ditut.
Oso pozik nago Berdintasuneko taldeko kide izateaz, bertan ikasten eta lanean jarraitzeko aukera baitut, pertsona guztientzat bidezkoagoa, berdinzaleagoa eta askeagoa izango den mundu bat eraikitzen laguntzeko.
Javier Muñoz Moreno
Jabi dut izena, Ermuan jaio nintzen 1974an eta hiru neska gazte zoragarriren aita naiz. Gazte-gaztetatik, eta anaiaren eragin zuzenagatik, nire interesak eta jarduerak gizarte-ekintzaren ingurukoak izan dira beti: justizia soziala, antimilitarismoa, internazionalismoa edo pobreziaren aurkako borroka, besteak beste, izan dira oinarrizko gizarte-mugimenduen esparruan aktiboki parte hartzera bultzatu nauten gaiak.
Tipo xumea, lasaia, eta alaia naizela uste dut. Xakelaria, bibliofiloa eta irakurle amorratua naiz; bitxikeria gisa, esan dezaket literatura klasikoa maite dudala, bereziki XIX. mendeko eleberria.
“Zipriztintzen” Ermuko Berdintasunaren aldeko Gizonen taldeko kidea naiz 2007an sortu zenetik. Beti esan dut talde honetako kide izatea izan dela nire bizitzako mugarririk garrantzitsuenetako bat; izan ere, denbora gizon zoragarriekin partekatzeaz gain, feminismorako eta maskulinitateei buruzko ikasketetarako sarbidea izan zen niretzat. Orduz geroztik, feminismoekin, berdintasunarekin, gizonekin eta maskulinitateekin lotutako guztiaz interesatzen hasi nintzen. Eta horrela erabaki nuen nire bizitza profesionalari bira bat ematea eta genero-berdintasunean trebatzea.
Akademikoki Filosofia (1994) eta Historia (1998) ikasketak egin ditut EHUn eta UNED-en. 2019az geroztik, Berdintasuna sustatzeko goi-mailako teknikaria naiz. Nire bizitza profesionalaren zati handi bat tokiko administrazio publikoan garatu dut, genero-berdintasunarekin, gizarte-prestazioekin eta diru-sarrerak bermatzeko errentarekin lotutako gaietan, eta, horri esker, leku pribilegiatu batean bizi izan naiz, kontzientzia kritikoa garatzeko eta aniztasunaren alde egiteko.
Leonard Cohenek “Anthem” izeneko bere abestian dio: “Arrakala bat dago gauza guztietan, horrela sartzen da argia”, eta horrela bizi naiz eta berdintasunezko mundu baten aukera pentsatzen dut, beti dago lekua mundu justuago eta askeago baterantz aurrera egiteko.
Pozik eta harro nago 2024tik Berdintasun kide izateaz, arrazoi askorengatik, besteak beste: denborak eta espazioak pertsona-talde zoragarri batekin partekatzeak dakarren pribilegioagatik eta prestatzen jarraitzeko eskaintzen didan aukeragatik.
Mikel Martin Arruabarrena
2020an, Bartzelonako Unibertsitate Publikoan nengoen lagun bat bisitatzen. Hura ikasten ari zen bitartean, ni liburutegian barrena ibiltzen nintzen, liburuei begira. Halako batean, feminismoari buruzko liburuen atalera iritsi nintzen. Denbora batez liburuak arakatzen aritu ondoren, neure buruari galdetu nion: «Ba al dago gai hauei buruzko ikasketarik?». Urte batzuk igaro ondoren, nire bizitza aldatu zuen une hura biziki eskertzen dut.
Nire ibilbide profesionala eta pertsonala naturaguneetan garatutako hezkuntza formalari eta ez-formalari, genero-berdintasunari eta gizonekin egindako lanari lotuta dago. Lan horren bidez, gizonek gizarte berdinzaleago baten eraikuntzan aktiboki parte har dezaten sustatu nahi dut.
Lehen Hezkuntzako eta Gorputz Hezkuntzako tituluduna naiz Euskal Herriko Unibertsitatean (UPV/EHU), baita Emakumeen eta Gizonen Berdintasuneko teknikaria ere, unibertsitate berean. Horrez gain, maskulinitateetan aditu izateko prestakuntza egin dut. Prestakuntza horri esker, gizonen sozializazioan, maskulinitate-ereduetan eta berdintasunaren arloan gizonekin lan egitean agertzen diren erresistentzia eta aukeretan sakondu ahal izan dut. Nire bizitzari begiratzeko modua aldatu zuen, eta ordura arte ulertzen ez nituen bizipen eta egoera askori izena jartzen lagundu zidan.
Nire jarduera-eremua, batez ere, komunitatearen esparruan eta kirolaren munduan garatzen da. Kirola gizartea eraldatzeko funtsezko eta beharrezko tresna dela ulertzen dut.
Kirolak eta naturan egiten diren jarduerek ere leku nagusia dute nire bizitzan. Hezkuntza- eta komunitate-potentzial handiko eremuak dira, baina, aldi berean, estereotipoek, desberdintasunek eta maskulinitatea ulertzeko modu tradizionalek oraindik ere presentzia handia dute horietan. Horregatik, irmoki sinesten dut kirolak balioak transmititzeko, zaintza sustatzeko, lankidetza indartzeko eta ingurune seguruagoak, anitzagoak eta berdinzaleagoak eraikitzeko duen gaitasunean. Gizonekin egindako lanaren ikuspegitik, kirol-eremu seguruagoak sortzea posible dela uste dut.
Genero-berdintasuna gizarte osoaren konpromisoa behar duen prozesu kolektibo gisa ulertzen dut. Komunitatetik abiatuta, gure gizarteak eraldatu eta bidezkoagoak eta berdinzaleagoak izatea da helburua.
Mikel Otxotorena Fernández
Nire kezka handietako bat berdintasunezko, parekidetasunezko eta bidezko gizarteak eraikitzeko gizonok dugun ardura da. Pertsonekin lan egitearen zale amorratua naiz, bereziki gizonekin.
Soziologian lizentziatua naiz (EHU, 1999), hernaniarra, eta etengabe ikasten eta xurgatzen ari naiz feminismoari eta LGTBIQ+ teoriei buruz. Emakume eta Gizonen arteko Berdintasunaren gaineko Masterra (EHU 2005), Garapena eta Nazioarteko Lankidetza Masterra (HEGOA, 2001). Hainbat administrazio publikotan egin izan dut lan, bertan zein eurentzako, irabazi asmorik gabeko erakundeetarako, baita nazioarteko organismoetarako ere. Nire ibilbidea, beraz, nagusiki bi arloren inguruan eraiki dut, alegia, gizon eta emakumeen arteko berdintasunean eta nazioarteko garapenerako lankidetzan.
Azken hamarkadotan, nire lan interes gune nagusiak gizon eta emakumeen arteko berdintasuna eta maskulinitateak izan dira, eta hala jarraitzen dute. On:Giz Berdintasunerako Elkartearen sortzaileetako bat naiz (2007). Genero eta maskulinitateen gaineko aholkulari gisa egin izan dut lan hainbat administrazio publikotan, nazioarteko organismotan (LANE), kolektibo sozialetan nahiz irabazi asmorik gabeko elkarteetan, batez ere EH mailan, Estatu mailan eta Ertamerikan.
Gizon Sarea elkargunearen sustatzaileetako bat izan nintzen, eta Estatuko Berdintasunaren aldeko gizonen sareko parte hartzailea naiz. Berdintasun Kooperatibaren talde ederreko kide izatearekin eta ekarpenak egitearekin pozarren.