Berdintasun

Berdintasun Proiektuak, S. Kooperatiboa Emakundek homologatutako aholkularitza da. Genero berdintasunaren alorreko zerbitzuak eskaintzen ditugu, enpresa, entitate zein erakundeei aholku emanez

Ezagutu gure proiektuak

Berdintasuneko taldea

Genero berdintasunari loturiko gai oro interesatu izan zait 80ko hamarkada hartan mugimendu feministan parte hartzen hasi nintzenetik.

Harrez geroztik, pertsonak izan ditut bereziki motibazio-iturri, giza taldeak, proiektuetan parte hartze aktiboa izatea, taldeak kudeatzea; betiere ikuspegi kritikoen, pluralen eta anitzen alde apustu eginda.

Gizarte Langintzan diplomatua, “Genero Berdintasuna arlo publiko eta pribatuan Unibertsitate Masterra”, Politika Publikoetako espezializazioa, eta “Kultur arteko Bitartekaritzan Aditua”.

2007-2011 aldian, ardura profesionala izan nuen Arabako Foru Aldundian Gizarte Sustapenerako Zuzendari gisa; horri esker, zuzendaritza- eta kudeaketa-lanen gaineko eskarmentua eta gaitasunak garatu nituen, hala pertsonen nola programen kudeaketan, eta hainbat gairen inguruan, hala nola: Emakume eta gizonen arteko Berdintasun Politikak, Immigrazio eta Kultur artekotasun Politikak, eta Garapenerako Lankidetza eta Giza Eskubideak.

Wassu-UAB Fundazioarekin Ikerlari, Emakume eta Neskatilen Genital Mutilazioaren prebentzioari buruz.

2013tik, ogibide gisa emakumezkoen taldekako nahiz banakako jabetzea xede duten proiektuak koordinatzen eta kudeatzen ditut.

Eskarmentu handikoa herrigintza-lanetan: gizartearekiko konpromisotik abiatuta boluntario gisa ibilia.

Josetxu dut izena, Lehen Hezkuntzako Magisteritzan diplomatua naiz (2011) eta Emakume eta Gizonen arteko Berdintasunaren gaineko Masterra egindakoa naiz, Euskal Herriko Unibertsitatean, EHUn (2012).

Hikaateneo elkarte politiko-kulturalean koordinatzaile lanetan aritu ostean, nire jarduera profesionalak azken 14 urteotan generoa eta maskulinitatea izan ditu ardatz, eta, horretarako, hainbat proiektu antolatu eta jarri izan dut abian instituzio, enpresa zein kolektiboen artean. 2008. urtetik Emakunde-Emakumearen Euskal Erakundeko Gizonduz ekimenean parte hartzen dihardut, bertako Idazkaritza teknikoan zehazki, 2018an aldi batez izan ezik. Horren helburua gizonon inplikazioa sustatzea da emakume eta gizonen arteko berdintasuna lortzeko bidean. Programa horren baitan koordinazio-lanetan jarduten dut, ikastaroak ematen ditut, bai aurrez aurre bai online, material teorikoak sortzen ditut, eta, era berean, programak abiarazten ditut maskulinitateez eta berdintasunaz.

Nire ustez, gizonekin lan egiteak berebiziko garrantzia du berdintasuna erdiesteko bidean euren parte hartzea areagotzeko; horregatik, hain zuzen ere, berdintasunaren aldeko taldeetan hartu izan dut parte, eta egun Estatu espainiarreko Berdintasunaren aldeko gizonen sareko kide naiz (Red de hombres por la igualdad). Hainbat talderen eta gizonen ahalegina biltzen duen espazioa da, eta elkarren babeserako eta elkartrukerako sareak sustatzeko sortu zen, gizonok berdintasunaren alde gehiago parte-hartzea helburu dutenak.

Norbanako eta langile gisa bizi izan dudan ibilbide anitzak sormenez pentsatzen irakatsi dit, bai enpresa arloan, bai artearen eta kultura komunitarioaren eremuan. Horregatik, ikuspuntu berrien bila nabil etengabe, edozein proiektu berri ilusioz garatzeko.

Gasteizko Horma Irudien Ibilbidearen sortzaileetako bat naiz. Bertan, 2001 eta 2013 artean, kultur esperientzia ugari izan nuen ikuspegi soziala nagusi zela, batik bat eskala handiko muralismoa hiri-transformaziorako eta gizarte-berrikuntzarako estrategia gisa ulertzen lagundu zidatenak.

Doce Miradas blogari feministen taldeko kide naiz.

Gaztelania eta ingelesa ditut ama-hizkuntza, Ikasketa Klasikoetan lizentziatua naiz Txikagoko Northwestern Unibertsitatean, eta Emakume, Genero eta Hiritartasun Ikasketak Masterra egin nuen Universitat de Barcelonan, politika publikoetako espezialitatea lortu nuelarik.

2016an graduatu nintzenetik egiten dut lan Berdintasun Proiektuak S. Kooperatiboan, hainbat egitasmoren kudeaketan eta parte hartzean murgildurik, bereziki Virginia Woolf Basqueskolan, EAEko udalerrietako emakume hautetsien jabekuntzarako sarean, baita LAIAeskolan ere, Arabako Emakumeon Jabekuntzarako eta Berdintasunerako Eskolan.

Nire kezka handietako bat berdintasunezko, parekidetasunezko eta bidezko gizarteak eraikitzeko gizonok dugun ardura da. Pertsonekin lan egitearen zale amorratua naiz, bereziki gizonekin.

Soziologian lizentziatua naiz (EHU, 1999), hernaniarra, eta etengabe ikasten eta xurgatzen ari naiz feminismoari eta LGTBIQ+ teoriei buruz. Emakume eta Gizonen arteko Berdintasunaren gaineko Masterra (EHU 2005), Garapena eta Nazioarteko Lankidetza Masterra (HEGOA, 2001). Hainbat administrazio publikotan egin izan dut lan, bertan zein eurentzako, irabazi asmorik gabeko erakundeetarako, baita nazioarteko organismoetarako ere. Nire ibilbidea, beraz, nagusiki bi arloren inguruan eraiki dut, alegia, gizon eta emakumeen arteko berdintasunean eta nazioarteko garapenerako lankidetzan.

Azken hamarkadotan, nire lan interes gune nagusiak gizon eta emakumeen arteko berdintasuna eta maskulinitateak izan dira, eta hala jarraitzen dute. On:Giz Berdintasunerako Elkartearen sortzaileetako bat naiz (2007). Genero eta maskulinitateen gaineko aholkulari gisa egin izan dut lan hainbat administrazio publikotan, nazioarteko organismotan (LANE), kolektibo sozialetan nahiz irabazi asmorik gabeko elkarteetan, batez ere EH mailan, Estatu mailan eta Ertamerikan.

Gizon Sarea elkargunearen sustatzaileetako bat izan nintzen, eta Estatuko Berdintasunaren aldeko gizonen sareko parte hartzailea naiz. Berdintasun Kooperatibaren talde ederreko kide izatearekin eta ekarpenak egitearekin pozarren.

Gizarte Langintzan graduatu nintzen EHUn 2017an. Gatazketan Esku-hartzea eta Gatazken Eraldaketa aipamena jaso nuen. Graduko praktikak Berehalakoan Hartzeko Zentroan (BHZ) egin nituen. Harrera egiteko udalaren baliabide bat da, genero indarkeria egoeran dauden emakumeei eta horien ardurapean daudenei zuzendua. Bertan aurrez aurre ikusi nuen emakumeok emakume izate hutsagatik bizi dugun indarkeriarik muturrekoena. Hori ikusita, gaian sakontzeko jakin-mina piztu zitzaidan, eta gradu amaierako lana sare sozialen bitartez transmititzen den matxismoari buruzkoa egin nuen.

Graduatu ondoren, Unibertsitate arteko Emakume, Genero eta Hiritartasun Ikasketak Masterra ikastea erabaki nuen, UBkoa, espezialitatea emakumeak, lan arloa eta politika publikoak izan zelarik (2019). Nire master amaierako lana belaunaldi berriak berdintasunean eta berdintasunerako hezteari buruzkoa da.

Masterreko titulua lortu nuenetik Berdintasun Proiektuak Kooperatiban egin izan dut lan, nagusiki Gasteizko Jabekuntza Feminista Eskolarentzat.
Gazteleraz primeran moldatzen naiz (ama-hizkuntza), baita euskaraz (C1) eta ingelesez ere (B2).

Horrez gain, boluntariotzan ibilia naiz buruko gaitzak dituztenekin, garapenaren nahasmendu orokortua dutenekin eta nerabeekin.

Gizarte Langintzan (UPV/EHU) graduatuta nago. Buenos Airesen praktikak egiteko luxua eduki nuen, eta bertan hiru proiektu ezberdinetan parte-hartu nuen: Hogar de niñas Nuestro Sol, Villa Lamadrid eta El banquito popular de la Buena Fe. Hiru iniziatiba hauetan bazegoen amankomunean zeukaten kontu bat: emakume izate hutsagatik indarkeria, diskriminazioa edota irainak jaso izan dituzten emakumeak zeudela.  Esperientzia honen ostean bai era profesionalean  zein pertsonalean ikasketa feministetan sakontzeko beharra sentitu nuen.

Zentzu horretan 2015ean UPV/EHUn Berdintasun Agente izateko masterra ikastea erabaki nuen. Ezin dut gizarte-lana ulertu hau transbertsalki feminista izan gabe. Lanbide honek gizartean eragiteko esparru-sozial oso handi hartzen du beregain, honakoa hobea izan dadin eta pertsona guztiak modu duin, inklusibo eta autonomoan bizi izan daitezen. Hori dela eta izugarrizko kontraesana izango litzateke bere lana ikuspegi feminista batetik ez egitea.

Mundua hankaz gora jartzearen beharrean sinisten du, gizarte justu, inklusibo, elkartasunezko eta inolako diskriminaziorik gabeko baten bizi ahal izateko. Inguratzen gaituen guztiarengan aktiboki eragiteko premian sinisten dut, eta horretarako nahitaezkoa da bir-pentsatzea, deseraikitzea, zalantzan jartzea, eta, batez ere, mobilizatzea.

Edozein bizitzaren eremutan eraldaketa pertsonala eta kolektiboa posible delakoan nago. Gizarte berdinzalea eta tolerantea, non aniztasuna errespetatzen den eta pertsonen arteko harremanetan menperatzeari uko egiten dion, eraiki dezakegu. Genero-berdintasunari dagokionez, gizonen konpromesua ezinbestekoa da.

Akademikoki, Magisteritza eta Teologia ikasketak egin nituen eta URJCn Genero Berdintasunean Masterra egina daukat.

Profesionalki, Lehen Hezkuntzako irakaslea izan naiz eta azken urteotan Arabako Foru Aldundian Aukera-Berdintasunaren teknikari aritu naiz lanean. Berdintasunaren aldeko gizonen aldaketa pertsonalean nahiz kolektiboan konprometiturik urte asko daramat. Prozesu hori 2006an hasi zen. Arabako Foru Aldundiak, Euskal Herriko Unibertsitatearekin batera, gizonentzako ikastaroa eskaini zuen, gizon horiek beste gizon-taldeen dinamizatzaile izateko asmoz. Handik Aurrera, 2018ra arte, EZ:BERDIN elkarteko kidea izan naiz, gizon-taldeen partaide zein bideratzaile. Berdintasunaren aldeko gizonen Euskal Herriko Elkargune, Gizon Sareko kidea ere izan naiz.

Berdintasun taldekidea izatea eta nire denbora genero-berdintasuna lortzeko sentsibilizatzeari eta prestakuntzari ekitea zorte handia da. Simone de Beauvoir-ek honela bukatzen du bere liburua Bigarren sexua: “Gizakiari ezarritako munduaren baitan askatasunaren erresuma nagusitaraztea dagokio; goreneko garaipen hori erdiesteko ezinbestekoa da, beste gauza batzuen artean, desberdintasun naturalen gainetik, gizonak eta emakumeak haien arteko senidetasunari zalantzarik gabe eustea.” Esaldi honek berdintasunarako bidean inspiratzen nau.

Mugimendu feministara iritsi nintzen txalaparta lantegi batean parte hartuz. Ordurako, Zuzenbideko Gradua ikasten ari nintzen EHUn. Gradua amaitu ondoren, kezkak argitu eta ikasteko asmoz, Ikasketa Feministak eta Generokoak Masterra egin nuen, baita EHUkoa ere.

Gaur egun, Berdintasun Agentearen Masterra ikasten ari naiz, eta nire lan-bizitza, ikasketak eta militantzia gizarte hobea, bidezkoagoa eta berdintasunezkoagoa defendatzera bideratuta daude.

Kontzientzia feminista hartzeak eta txalaparta klase haietan hasitako bide indibidual eta kolektiboak hamaika esperientzia eta ikaskuntza ekarri dizkiote nire ibilbideari. Horregatik, beti eskertuko diet lagundu didaten emakumeei, eta saiatuko naiz beste batzuek aukera izan dezaten askatzaile eta konpontzaile izango zaizkien prozesuei ekiteko.

Ezin izango nuke nire ibilbidea deskribatu Basaurikoa naizela esan gabe, eta horrek Marienea (Emakumeen Etxea) hainbat ikuspegitatik ezagutzeko eukera eman dit: Jabekuntza Eskolako ikasle gisa, militante gisa eta langile gisa. Marienean, zehazkiago, Emakumeentzako Informazio Zentroan egin nituen aholkularitza juridikoko praktikak, eta urte batzuk geroago, Marieneako gainerako lankideekin batera gauzatu nuen proiektua “Basauri hirigintza feministaren ikuspegitik. Ikuspegi kritikoa eta hobetzeko proposamenak udalerriko emakume kolektiboetatik.”

Eta, badakizue zer den okerrena? Oraindik ez dakit txalaparta jotzen.

Beti argi izan dut eraldaketa sozialerako bidea pertsonekin zuzenean lan egitea dela, gizarte askeagoak, bidezkoagoak eta berdinzaleagoak lortzeko ezinbesteko aldaketa-motorra baikara.

Horregatik, Salamancako Unibertsitate Pontifizioan Psikologian lizentziatu nintzen, eta, ondoren, Madrilgo Unibertsitate Autonomoan Krisi, hondamendi eta larrialdi egoeretan esku–hartze psikosozialean espezialista graduondoko bat egin nuen. Hainbat urtetan, esku-hartze psikosoziala egin dut haurreria, nerabetasun eta gazteriarekin, eskubide-urraketen, giza mugikortasunaren eta babesgabetasun-arriskuaren egoeretan, hainbat testuinguru eta latitudeetan.

Beste kultura eta errealitate batzuk ezagutzeko gogoak Ekuadorren bizitzera eraman ninduen, eta han pertsonalki eta profesionalki garatu ahal izan nintzen hainbat urtez. Bizi-esperientzia horrek aukera eman zidan gizonekin eta maskulinitateekin lan egiteko mundura hurbiltzeko. Denbora horretan, berdintasunari eta maskulinitateei buruzko prestakuntza-prozesuetan lan egin ahal izan nuen zenbait organizazioekin: gizarte zibilekoak, erakunde publikoak eta nazioartekoak. 2015ean Ekuadorren Gizonekin eta Maskulinitateekin Lan Esperientzien Nazioarteko I. Topaketaren antolakuntzan ere parte hartu nuen.

Maila pertsonalean, urteak daramatzat berdintasunaren aldeko gizonen taldeetan parte hartzen, 2017tik Ongiz-Ezberdin elkarteko gizon taldekide. Gizonen aldaketa pertsonal eta kolektiboan sinesten dut; gizartea berdintasunerantz eraldatzeko funtsezko elementua da